Get Connected!

Liefde is..

As ek in wiskunde sou sê X = Y, dan vertel X my wat die waarde van Y is, maar omgekeerd vertel Y my ook wat die inhoud van X is, want as ek sê X =Y, dan is Y noodwendig ook gelyk aan X!

Logika bepaal dat ek nie kan sê X is gelyk aan Y, en dan ontken dat Y op sy beurt ook gelyk is aan X nie.

Maklik genoeg!

In sy eerste brief skryf Johannes vir ons "God is liefde"
Met dié stelling vertel Johannes ons meer oor die karakter van God. Maar net soos in wiskunde is die omgekeerde natuurlik ook waar: Johannes vertel ons ook meer oor die karakter van die Liefde!

As ons wil weet wat Liefde is, dan sal ons dit in die karakter van God kan kry.

Die hele wêreld gee 'n sug van verligting as ons sê "God is LIEFDE," want ons koester baie gerieflike voorveronderstellings oor wat liefde nou eintlik is.

In die interaksie tussen Kerk en Wêreld sien ek 'n tendens om die dinge wat mense ongemaklik laat voel as't ware van die tafel af te vee met troos in die woorde "God is Liefde"

Draai ons die vergelyking egter om, dan kom daar ongemak. As jy die vraag "Wat is liefde" antwoord met Johannes se stelling "GOD is liefde" – dan roep dit beelde op waarmee selfs gelowiges nie heeltemal so gemaklik voel nie.
En juis die dinge waarmee ons nie gemaklik is nie oefen vir ons daardie spiere wat aandag nodig het vir ons geestelike groei!

So, kom ons oefen die vraag "Wat is Liefde" met die gewigtige antwoord "GOD is Liefde!"

Kan LIEFDE 'n voorstander van die doodstraf wees?: Ja, want God het die doodstraf ingestel en.. "God is liefde".

Om die ter dood veroordeelde met 'n spies te deurboor of met 'n swaard om die lewe te bring, sou vinnig wees, maar (God is Liefde) het bepaal dat die doodstraf deur steniging voltrek moet word.

(God is Liefde) het bepaal dat, nie soldate nie, maar gewone gelowiges klippe moet optel en 'n moordenaar met klip na klip moet tref teen hand en tand en rib en maermerrie en kniekop en skedel totdat die bebloede, gekneusde moordenaar ineensak en aan sy beserings beswyk.

"God is Liefde, juig ons harte, en BEDINK wat liefde doen.." lui 'n bekende gesang: Kom ons bedink wat liefde doen en ons voel ongemaklik daarmee, sodat ons geestelik kan groei en kan verstaan dat liefde iets baie meer omvattend is as dit waarmee die verlore wêreld gemaklik voel.

(God is liefde) vertel vir ons met Sy Wette en bepalings en met Sy optrede wat liefde regtig is.

Ek het nog baie voorbeelde wat ek wil noem, maar ek sal graag 'n rukkie daarmee wag, want as jy kans sien, is dit nou eers JOU beurt om te noem hoe die karakter van God, soos ons Hom in Sy Woord leerken, ons siening van Liefde verbreed..

Read More...